هوا أنا كده طب اعمل ايه فى نفسى

الاثنين، 27 أغسطس، 2012

وبعديــــن يادبدوبى ؟؟

 

 
امبارح بالليل أعدت على سريرى مش عارف انام ... افتكرت نفسى وانا صغير 
كانت الحاجه الوحيده اللى مش بتخلينى اعرف انام انى ببقى خايف من الظلمه 
كنت ساعتها بروح انام فى حضن ماما أو كنت بحضن الدبدوب بتاعى وانام
ده كانت كل مشكلتى اللى بتأرقنى وبتودّى النوم من عينى 
بس امبارح انا مكنتش خايف من الظلمه ... ومكنتش عارف انام !!
كنت متدايق اوى ومش طايق نفسى 
قومت وطلعت الدبدوب بتاعى وقولتلو نيمنى زى مكنت بتعمل زمان واحنا صغيرين 
حسيت انو بيقولى : وانت صغير كنت بهدى فيك خوفك وانيّمك ... لكن دلوقتى اهدى فيك ايه ولا ايه ... بصيتلو وقولتلو يارتنى ارجع صغير تانى 
وقعدت افتكر نفسى وانا صغيرلما كنت بقلد الكبار وكان نفسى اكبر اوى عشان اعمل زى الكبار وابقى كبيييييير بقى 
لكن لما كبرت 
اتمنيت انى افضل علطول صغير اتمنيت ارجع الطفل اللى بحبه اللى بيتعامل مع الناس كلها بعفويه وميعرفش اى معانى تانيه غير المعانى اللى اتفطر عليها اللى ربنا خلقوا بيها ومفيش حاجه غيّرتها طفل مليان براءه وحب وصدق واخلاص فى التعامل 
اه عايز ارجع طفل تانى لأنى اكتشفت انو مينفعش نتعامل ببراءه لما نكبر .. مينفعش ..... اه والله مينفعش 
وكمان مينفعش ارجع طفل :(... مش شايل اى هموم وواخد الحياه على انها مغامره ولعبه لطيفه 
مينفعش ارجع الطفل اللى كانت اكتر حاجه بتسعده الحلاوه المسكّره واللعبه الجميله 
واكتر حاجه بتدايقوا طعم الدوا اللى الدكتور كتبهوله !!
يـــــــــاااااه 
لوكنت اقدر اسيب الحياه بارادتى وارتااااااح 
وهو برضو هريح الدنيا منّى مش يمكن المشكله فيا ؟؟؟ 

الكاتب : الطفل اللى كبر وياريته ماكبر !! 



السبت، 25 أغسطس، 2012

احترت أنا !

قلب الانسان لايغضب منه ابدا .....
لانه يعلم يقينا أنه اذا غضب وتوقف عن النبض .... سيموت الانسان
وهو لايريد أذية صاحبه (بالرغم من قسوة صاحبه احيانا عليه واجهاده وجرحه واثقاله بالهموم ) فهو يعلم أنه بحاجته فيقف بجانبه وينبض ويستمر بالنبض حتى يبقى صاحبه حيا وليخفف عنه مايعانيه
.......... ياله من قلب حمووووووووول وفىّ لصاحبه
فماذا تفعل لو شعرت أن قلبك سيتوقف عن النبض ؟؟
ماذا تفعل لو شعرت بضيق وكأنك تلفظ أنفاسك الأخيره ؟؟
ماذا تفعل لو تخلّى قلبك عنك ؟؟
هل تستطيع العيش بعدها ..........؟؟؟؟؟؟؟؟؟؟؟
أبدا لن تستطيع العيش  .......
لكن ماذا تفعل ان تخلّى قلبك عنك وانت لم تمت ؟؟
هل يعيش أحدنا بلا قلب ؟؟
نعم أريد الموت ولكننى لست بميت 
.
.
فلو كان الخيار بيدى لتركت الدنيا بمافيها منذ زمن 
لان ضحكى واقبالى على الحياة  صار يعد جريمه !
وبكائى ايضا وعبوسى جريمه ! 
.
.
احترت انا 
يــــــــــــــــــــــــــااربّى 
 

الأحد، 12 أغسطس، 2012

رايحه على فين يابلد ؟؟؟



رايحه على فين يابلد ؟
كنت معتبراكى سند 
وان ظهرى عليكى متسند 
عارفه يابلد أنا موقعتش .... دنتى عارفه اللى اتهبد 
أنا يابلد ..أنا يابلد 
كل مافوق من قلم آخد التانى واتجلد
وبعدين يابلد ... وبعدين ياسند 
ظهرى اتقسم من كتر الكبد(بفتح الباء)
الحمل زاد وكل ماابنى حد بيهد 
فيكى اللى مبسوط بالهدد 
.
.
طب اعمل ايه يابلد 
أطلب من مين السند 
من كل حاجه فيكى بتجلد 
ده كفايه الحرقه على دم الولد
حسبتى كام وصل العدد ؟
كـــــــــــــــام وصل العدد؟؟
ااااااااه يابلد 
كل يوم بتقدّميلنا شهيد 
راااح ومنعرفش مات بأى ايد 
ياترى مين اللى بيكون بموتهم سعيد؟
ميـــــــــن يابلد ؟
عارفه يابلد ... رغم الهدد ... ورغم الكبد ... ورغم الدّم اللى مالو عدد 
عندى امل انو هيوصلّك مدد 
ربّك سند . ياااااااااابلد ربّك سند 
ربّك سند 
وبايده يحميكى يابلد  



 
 

ااااااااه يابلد






نواسيكى ونعزيكى ونشجب ونستنكر ونرفض كل عدوان عليكى وعلى أبنائك أيتها الغاليه مصر 
ألن ينتهى نواح الثكالى على أرضك ؟
أعلم اننى تأخرت كثييراا فى الكتابة عما حدث ! لعلى افهم ماحدث 
ولكنى يامصر لم أعد افهم يامصر مايدور فيكى ولم أعد أستوعب مايدبّر لكى من مكائد .
يعتصرقلبى ألما كما ينفطر قلب كل مصرى من الألم يحب بلده ولايدرى الى اين هى ذاهبه ؟؟
هل يعقل فعلا انها متجهه الى حافة الهاويه ؟؟
ودّعنا ابنائك يامصرنا هم من خيرة شبابك نحسبهم كذلك .وفى خير الشهور 
ودّعناهم لأنهم كانو يحرسون امنك على حدودك 
من فعل ذلك بهم ؟؟ من قتلهم ؟؟ ولماذاقتلوا ؟؟ومالسبب ؟؟
كل ماأعرفه هو كيف أخذو على غرّة كيف قتلو بكل خسّه ووقاحه 
كل ماأعلمه أنهم اغتيلوا وقت الافطار بكل قسوه وبلارحمه 
هذا فقط ماأعرفه  
انى اقف مشتته.. بل انّى قد جننت 
من فعل ذلك بابنائك ايتها الحبيبه مصر 
_هل هى اسرائيل ؟ (لقد سحبت رعاياها من سيناء قبل الحادث . كما أنها تود أن توتر العلاقه بين مصر وغزّه بكل تأكيد .كما أنها دائما ماتسعى لكل قبح ودمار )تفوح رائحتها بكل قوه فى تلك الحادثه 
_هل هم جماعات ارهابيه من سيناء ؟ (من سلّطهم ؟ وهل هم مصرييون ؟؟وما مصلحتهم فى قتل أشخاص هم من بنى جلدتهم ؟؟)
_هل هم جماعات ارهابيه منفصله عن منظمة حماس ؟؟ (كما يقال )(من سلّطهم ايضا ؟ وما مصلحة غزّه وحماس فى ان يقتل جنود مصرييون ؟ أو أن تغلق الحدود أو أن يستفزّو أمن مصر وأمانها بهذا الشكل الدموى ؟؟ ) ألا تشاركونى الرأى أن اسرائيل هى من يستفيد بذلك ؟؟
_هل هو المجلس العسكرى نفسه ؟ (رئيس المخابرات كان لديه علم بما سيحدث لكنه لم يتوقع أن يقتل مسلم أخاه المسلم ساعة الافطار)(يافرحة أمك بيك ) 
لازم نتكلم بلدى بقى دلوقتى 
والله ياأستاذ الكلام ده عيب على منظرك قبل مايبقى عيب على منصبك 
غير كده زعزعة الامن للرئيس الجديد اللى بيحاولو يسيطروا على كل صلاحياته ويقوموا الشعب ضده ويحلّوله البرلمان قبل مايجى عشان مايلقيش فرصه يعرف يعمل من خلالها حاجه عدله فى البلد .ده غير بقى التخنيق عليه ويقطعوا الكهرباء والميه ويعملوا أزمه فى كل حاجه عشان الشعب يلعن اليوم اللى جه فيه 
_(لا ازاى المجلس العسكرى يقتل ولاده ؟؟)
فى ناس كتيير مش متخيله (ان لسه فى قذاره فى البلد )زى قذاره حبيب العدلى اللى كانو بيقتلو الناس كده من غير اى ذنب وبأبشع الصور ولا نسينا خالد سعيد .ولاّ سيد بلال (عملوا ايه دوول ؟) وغيرهم كتير ولا نسينا الدّم اللى لسه الدموع مجفتش عليه من ساعة الثوره وكوول اللى حصل بعدها 
هوا ده مش دم ؟ ومش أرواح راحت من غير أى ذنب ؟
يبقى ليه نستغرب ان المجلس العسكرى يقتل 16 من ولاده من أبناء بلده وجيشه
من حماة وطنه؟
أنا عن نفسى مش عايزه اصدق ان المجلس العسكرى ليه ايد فى الموضوع ده .... لأنى لو صدقت يبقى خلاص كده عليه العوض فيكى يابلد ....
بس مش قاهرنى الا البيه اللى كان عندوا علم بالحادث (رئيس المخابرات المحترم -المفترض انو محترم -)
ومش قاهرنى برضو الا الاستغاثه اللى قعد يبعتها الجنود من الموقع ومحدش بيرد عليهم ... !!! ده تفسيره ايه ؟ ملوش الا معنى واحد (موتوا احنا عايزينكم تموتوا ) حد يفسّرلى أو يفهّمنى لو أنا بهرتل 
أنا فعلا حاسّه انّى اتجننت خلاص 
مش اللى بيحصل ده  يدعوا للجنان ؟؟ هوا فى ايــــه ؟؟ 
ايـــــــــــــــــــــــــه؟؟ 
ااااااااااااااه يابلد بجد ربنا يسترها عليكى ياغاليه