هوا أنا كده طب اعمل ايه فى نفسى

الثلاثاء، 17 يوليو 2012

ايه ياشعب النكته ؟



 
هيا الناس اللى بقت مكشّره طبيعى ولاّ أنا اللى مش طبيعيه !!؟؟
(شعب النكته )ده الاسم اللى بيطلق على المصريين
طيب شعب نكته .. وبيحب الضحك .. حتى واحنا قاعدين فى فى عزا مثلا .. تلاقى واحد طلع بافيه ولاّقلش  قلشه ... ضحّك الناس كلها
واللى مثلا حصلتلو حاجه دايقتو .. صحابوا مش بيسيبوه الا لما يضحك ويكركر ويحس انّه معندوش دم :) ... اه والله هوا ده الشعب المصرى
.لو طلعت النتيجه مهببه مثلا (لاقدر الله ) .. تلاقى الواحد بياخدها بهزار وضحك وبيبقى عايز يعد عند صحبو وميروّحش عند الحاج هههه (هيتهزّأبرضو ) المهم انو بيضحك برضو (قلّة دم ) هههههههه
حتى فى اصعب الاوقات (لمّا تبص فى ورقة الامتحان وانت مش عارف ولا سؤال بتعد تضحك برضو ؟؟!!)

ليــــــــــــــــه بقى لما بنزل الصبح كل اللى بقابلهم مكشرييين :(  بلاقى الكل ماشى مصدّر ال(111) ولو غلطت  وبصيت لحد فيهم وابتسمت يزغرّك كده ويبقى هيخنقك
. لما بركب اى مواصله برضو بيبقو مكشرين ومش طايقين بعض خــــــالص أو بالاصح مش طايقييين نفسهم (ومايسدّقو تحصل اى حاجه ولو صغيّره زى مايكونو بيتلككو عشان يتخانقو )
يموتو فى الخناقات الصبح وانت متأخّر مثلا ياااااه
ويبقى الواحد هيتنقط ...
طب يمكن الصبح عشان لسه صاحيين من النوم .. وكل واحد زعلان انّو مكملش نومو بقى وفارق سريرو ومخدّتو
طيب .. صحيتو وروحتو الشغل وفطرتو كمان ... ليه لما بنروح اى مصلحه حكوميه او اى شركه او اى مكان بيبقى الناس برضو مكشرين ؟؟
وياسلااام لو انت عايز تعمل حاجه فى مصلحه حكوميه بقى .... تبقى امك داعيه عليك .. أنا بحس ان الواحد قاتللهم قتيل متعرفوش ولا ايه ؟؟؟
هوايتهم تعذيب الناس !!!
(شغل بقى وضغط وبتاع هيضحكو على ايه )
طيب ... وهما راجعين من شغلهم برضو مكشرين ؟؟؟
(راجعين من شغل وقرف ودوشه ولو الدنيا حر بقى عايزهم يضحكو على ايه )
طيب انزل فى اى وقت وبص فى وشوش الناس (%99) منهم مكشريييين
ومش طايقين نفسهم وممكن كمان يتخنّقوا على الناس اللى ماشين حواليهم
انا مش بقول نمشى نكركر يعنى ونبقى عبط بس
(تبسمك فى وجه اخيك صدقه )
مش نبينا الحبيب قالنا كده صلى الله عليه وسلم
ياريت بقى نتصدّق بالبسمه ده واحنا ماشيين
طيب... زحــــــــمه (اه )البياعين خنقونا فى كل مكان محطات وشوارع وحوارى وكلو (اه) فى ناس متخصصة رذاله ومرازيه فى الخلق (اه)
بس برضو نحاول على قد مانقدر أول مانتدايق نستغفر كده ونذكر ربّنا
شويه صغيريين وهنفك التكشيره ده على فكره :)
بلاش تضحك علطووول ولا تكشّر على طووول خلّى خلقتك طبيعيه زى ما خلقها ربنا (سيب وشك فى حالو لو سمحت )
وافتكر ان الناس ملهومش ذنب فى الحاجه اللى دايقتك ... يبقى تطلّع ديقك عليهم ليه ؟
وكبّر دماغك بقى شويه ومدايقش نفسك
وخليك دايما مبتسم على فكره بتكون احلى :)
وبلاش نحط فى دماغنا ان الدنيا قرف ونقابلها بتكشيره .. كدا كدا الدنيا مفيهاش راحه (ولقد خلقنا الانسان فى كبد ) الراحه فى الجنه انشاء الله
يبقى بلاش تعيش فيها مكشّر بقى
عيش مبتسم :)
هتخسر ايه ؟؟ 



هناك 7 تعليقات:

Unknown يقول...

هذا ما أصبح عليه حالنا اليوم يا زهراء يا اختى والله حتى النكت كلها بقت بايخه تحسى ان الناس مبقتش فاهمة هى عايشه ليه تكلميهم بالدين يقولك انت هتعملى شيخ تكلميهم بالسياسه يقولى انت هتعملى فليسوف مش عارف العيب فى مين بالظبط ممكن يكون داء وصاب البلد وربنا يستر بس اعتقد ان فى واحد مش كده او على الاقل دلوقتى بقوا اتنين انا وانتى انا عمرى مكشرت فى وش حد لو حتى بكرهه كره اللدغ وبحاول اخلى الناس تضحك ولو ضحكه بسيطه
خديها منى نصيحة لو هموم الدنيا كلها فوق دماغك روحى لطفل صغير قيمة سنه او اتنين وهو هيتكفل بالباقى وهيخليكى ترجعى سعيدة تانى بضحكته البريئه الجميلة

Alzhraa_Mustafa يقول...

تعليقك جميييل جـــداا يااسلام
شكراا ليك :)
بس اكيد فى ناس تانيه برضو لسه متمسكه بضحكتها اكيــــــــــــــــد

غير معرف يقول...

جميله ما هو مكتوب دة حقيقتنا نوع من التفاؤل والخروج من جوالحزن اللي احنا عيشينوا

أحمد أحمد صالح يقول...

هنخسر؟
دا احنا هنكسب كتير !!
كلامك كله جميل يا زهراء،عاوزين نخف شوية من حالة التحفز اللي احنا بنعيشها، متحفزين لبعض على أي شئ..كان في حد أعرفه من زماااان كان دايما يحكي و هو مبتسم و بيضحك و ينهي كلامه و يقول..و قمت ضاحك و الحياة حلوة لذيذة !!
..
دا حتى الدين جعل البسمة صدقة،فتبسمك في وجه أخيك صدقة كما أخبرنا الرسول عليه الصلاة و السلام..فلنحعلها دعوة للتفاؤل و الابتسام..
تحياتي

Alzhraa_Mustafa يقول...

أسعدتموووونى جمييعا بتعليقاتكم

شكراا لك استاذ(احمد ) ^_^
فلنجعلها دعوه للتفاؤل والابتسام

Unknown يقول...

سعدت بوجودى هنا وقراءة كلماتك ..
دعينى أنظر لها معك من نظور آخر..
مش بيقولوا العيون الجميلة بتشوف الكون اجمل والنفوس الحلوة بتشوف الكون والناس احلى ..
يمكن بقى كتير فينا العيون اللى مش بتقع غير على الوحش..ونفوس زى الدبّان..بتقف على العفن بس..
مش عايز اكون متشائم او أسئ روعة كلامك بتعليق سئ
لكن اظننا محتاجين زى ما الاخوة سبقونى محتاقين نصلح جوانا كلنا ..علشان نشوف الحلو من بعض ونضحك من القلب بجد تحياتى العطرة لروحك

Alzhraa_Mustafa يقول...

دائما تسعدنى بتعليقك استاذ (osama)
لاتحرمنى من مروك فهو دائما يفيدنى ويشجعنى :)